உனக்கென உதிர்ந்த வரிகள்

ஒவ்வொரு வருடமும்
ஓயாது உணர்த்திடும்
உன் மலர்வு நாளை
மகிழ்வோடு கடந்திடப்
போராடுகிறது மனம்


ஏக்கம்தான் வாழ்வாவென
எண்ணத்தோன்றுகிறது
ஏனிந்த ஏமாற்றங்களென
எய்த்து நிற்கிறது மனம்


அத்தனை தந்தைக்கும்
அகம் நிறைத்திடும் செல்வம்
அன்னையாய் மலர்ந்திட்ட
அருமை மகளின் நிகள்வல்லவா


தாய், தாரம் கடந்த பாசம்
தங்க மகளின் திகட்டாத நேசம்
தரணியை வென்ற தற்பெருமை
தளரந்திடா வாழ்விற்கு
(இறைவனை) வேண்டுகிறது மனம்



மகளே என நான் மகிழ்ந்த போது
மகனே என்றழைத்து
மகிழும் உனைக் கண்டு
பூரிப்பில் விக்கிநிற்கிறேன்


ஒவ்வொரு பிறப்பிலும்
மகிழ்கின்றன மனங்கள்
உன் மலர்வில் இணையற்ற மகிழ்வை
அடைந்ததென்னுள்ளம்


கண்ணான என் கண்மணியே
இனியடையும் காலத்தினை
பொன்னானதாய் மாற்றி
கற்றலோடும் கண்ணியத்தோடும்
உலகையும் உறவுகளையும் அடைந்து
உன் வழியில் வெற்றிகளை
நிர்ணயித்துக்கொள் தனித்துவமான
உன்னை நீ உணர்ந்து
முயற்சிகளோடு முன்னேற்றம் கண்டு
ஈருலக வெற்றியை உனதாக்கிக்கொள்
உமக்கான என்பிரார்த்தனை என்றும்
உன் பாதையில் வரைந்துநிற்கிறேன்
வாழ்த்துகளும் பிரார்த்தனைகளும்

பதிவுகளை இலவசமாக ஈமெயிலில் பெற